|
Cal respectar los eretatges, los assimilar e los trasmetre. Pas oblidar. Aquò fai
50 000 ans a pus prèp viviá jos lo ròc de la Ferrassiá un clan Neandèrtal que las
sepulturas, retrobadas a partir de 1909 per lo regent de Las Aisiás Denis Peyrony,
emocioneron nòstres congenères al punt de far enfin entrar
los Neandertalians dins l'istòria de l'umanitat.
Al sègle passat, al dessús d’aquel quite ròc viviá un coble de paísans, la Loísa
e l'Albin. Avián tot maisei qu’avián mestier de ren ; una vaca, de la polalha, un
carrat de vinha, los boinricons en fuelhards fachs a l’ostal per anar cerchar los
botarèls e tornar de las castanhas per lo tesson. Son estat mos grands parents d'amor
e d'afeccion. Son mòrts plan viste, en 1978, totjorn vius dins mon còr. Pauc de
temps aprèp dins la maison juste a costat son arribats Patric e Nicòla Montfort,
a la Ferrassiá. De lor union es nascut Julien en 1979. Julien ? aquò èra lo vertadièr
prenom de l'Albin,
que coma cadun zo sap, cada paísan del Perigòrd pòrta un nom d'emprunt que a ren
de veire amb son estat civil. E vos Patric qu’avetz aimat tan fòrt aquel Perigòrd
que vos adoptava a vòstre torn : « Sei segur qu’exista una simbiòsi entre
los òmes e la tèrra » çò-disetz, creatz una entrepresa per portar naut e luènh
lo renom de las bravas e bonas vinhas de chas nos, las del ranvèrs de Brajairac
longtemps presas de naut per los Bordalés. E aquela entrepresa la batejatz fòrt
polidament : "Julien de Savignac", una man parada vèrs l'avenir, vèrs vòstre
dròlle plan segur, e benleu tanben sens lo saber dejà enrasigada dins lo terrador
ont l'avetz plantada.
QUALQUAREN EN EL DE FERRASSIÁ
Inventiu, determinat, amb vòstra familha a vòstres costats, bastissetz un emperi
amb un ostal bien situat a Albuga, a Perigüers, a Mont Basalhac e quitament a París.
Lo 13 d’octobre 2007, jos lo solelh prodigiós d'una fin de devalada plan perigordina,
recebetz l'egrègia distinccion : "la Crotz de Chivalièr de la Legion d'Onor"
de las mans del prefècte de la Dordonha, Joan-Francés Tallec. La scèna se debana
al claus l'Envège a Mont Bazalhac demest tots vòstres parents e amics, e mai que
mai vòstre clan al grand complet, tresvirats de vos veire vos-meteis tant esmogut
en la circonstància.
President de l'interprofession dels vins de Brajairac, fasetz de las proessas per
defendre la subrevita d’aquel vinhal en assegurant son raionament als uèlhs del
monde. Manquetz pas de front e aquò’s aquela audàcia constructiva, combativa que
vos val aquel jorn aquela reconeissença suprèma.
De vòstre biais, fasetz onor a la Ferrassiá, en aparant son terraire sas tradicions
Dins 50 000 ans, l'istòria de nòstras vitas, nòstras batèstas, nòstras migranças
apassionaràn tant los arqueològs coma la petita populacion neandèrtaliana de la
Ferrassiá uèi ?
Modestament, laissem-lor aquela petita traça d'un brave moment partatjat entre Sapiens
Sapiens, coratjós e braves, e mai se ren non dura.
a Loísa e Albin
Sofia Cattoire
|
