QUAND LOS PAPINS FAN PLANAR LOS PICHONS… LO FOT A ALBUGA, UNA AVENTURA UMANA

« Çò qu’aimi ? Anar veire los pichons jogar. Los pichons aquò’s formidable. Quand marcan un but, s’i creson ja... fan l’avion coma Pauleta ! » Daniel Heinen, president del Foot Cantonal Le Bugue-Mauzens (FCBM), sorís de bon còr e son agach belugueja de contentament. Son coma aquò los retirats en plena fòrma que enquadren e fan viure lo fot cantonal. Çò que los ten drech son justament aquels dròlles sens complexe, dieus de l’estadi en èrba… Tot-parier, sapcham rason gardar. Sèm luènh dels transfèrts e dels miliards, luènh de las còpas del monde als enjòcs planetaris… Sèm a Albuga, darrièr los carris Rey, sus lo terrenh de fot de las Fontanilhas. Aquò’s aquí que s’entraïnan cada setmana los debutants, poletons e benjamins, parièr coma l’equipa primièra. Tot aquel pitit monde s’es tornat trobar calorosament lo dimenge 7 de genièr de 2007 al torn d’una còca del reis a la sala del camping del Pòrt de Albuga per assistir a la tradicionala remesa dels malhòts. En preséncia dels elegits locals : Girard Monzie, delegat als Espòrts, Marivona Piques, delegada a las Escòlas e al Torisme, en preséncia tanben dels mèras de las comunas vesinas : Francés Castang de Mauzens e Miramont e Pau Laval de Savinhac de Miramont. Per l’equipa seniors, los malhòts son estats fornits per "Le Celtic" e "l’Aquarium". Per l’escòla de fot, aquò’s l'« Hôtel Restaurant du Château » de Campanha que a balhat trenta tengudas per las diferentas tièras d’atges. Daniel Heinen a d’un autre costat tengut a remerciar los anonçaires presents suls panèus publicitaris aquela sason, de saber los "Voyages Rey" e "Autosur" a Albuga, "La Menuse" a Jorniac, l’entrepresa "Alain Urvoy, constructor de tennis" a Mauzens e Miramont e "Olivier Dupuy, charpentas e cobèrtas" a Sant Félix de Relhac. Un clan plan sarrat d’amators de fotbòl que visan pas lo Mondial mas sabon l’importància d’aquela disciplina dins lo teissut social intergeneracional.

FCBM : LA RESPELIDA PER L’EQUIPA PRIMIÈRA

L’equipa seniors del Fot Cantonal Albuga Mauzens entraïnada per Joan-Ives Bonnet, a per capitani dempuèi 2003 Joan-Miquèu Rose, d’un autre costat cantaire de gospèl dins la formacion perigordina "Lo Gospèl", nom causit « per far color locala » coma nos l’explica. « Au moment ont sei arribat al club, los rengs èran en tren de se semenar clar, nombrós jogaires de l’equipa primièra partián. Avèm decidit de tornar partir de zerò aquesta annada, amb fòrça joves e jusca a alara aquò nos reussís puslèu plan : avèm perdut paguna partida dempuèi lo començament de la sason. Sèm en tren de tornar partir, en préner nòstre temps. »

Vaquí la fòrma de sapiéncia acquesida pels seniors de l’ententa Albuga-Mauzens. Lo fot cantonal, luènh de las palhètas, demòra esportiu en tota simplicitat.

LO DISTRICT RECÈRCA BENEVÒLES

Lo FCBM es gerit pel District de Fotbòl Dordonha Perigòrd basat a Periguërs e presidat per Patric Mattenet : « 37 ans d’arbitratge, Patric aquò’s lo rei dels arbitres ! » çò-ditz ufanosament son vice-president Renat Monsallut, retirat desbordant d’energia, benevòl acomplit : « Dempuèi qu’ai de temps liure, passi quasiment tota la setmana al District. Administram 162 clubs, 15 000 licenciats e organisam 400 a 500 matchs cada dimenjada... Aquò se fai pas tot sol ! » De mai lo District manca de benevòles, de dirigents per las equipas primièras mas tanben d’educators per enquadrar los debutants : « Nòstre president compta ben escriure a tots los mèras de las comunas de Dordonha per que buten los retirats a s’investir, precisa Renat Montsallut, l’espòrt, aquò’s la vita ! » Avis als amators.

Las coordenadas del District :
District de Fotbòl Dordonha Perigòrd
BP 201
24 052 PERIGÜERS CT Cedex 9
Tel : 05 53 07 06 11

President : Patric Mattenet, vice president : Renat Monsallut.

PROMOCION SEGONDA DIVISION

Lo 11 de febrièr de 2007 las doas primièras equipas de la promocion segonda division : Albuga-Mauzens e Le Coux e Bigaroque se son rencontradas sus l’estadi de Mauzens Miramont. Una fòrt bèla rencontra plan disputada que s’acabèt logicament per un match nul. Le Coux e Bigaroque demòra aital primièr de sa categoria e Albuga-Mauzens invencit.

Sofia Cattoire