Fotòs de l'article Estampar l'article Somari Barratz aquela fenèstra Estampar l'article Somari

FÒL COMA UN IMATGE

Préner çò que l'òm vei, quala folia ! Tots los cors d'optica m'explicaràn pas aquel poder magic que nos es acquesit. D’unas fotòs me fan plorar, en tot me consolar d'aver pogut salvar aquela part preciosa de la persona aimada, dins aquel endrech ont aviam caminat. La memòria sèrva e farga de sòmis, dins aquel autre monde onte m’es pro de levar los braç per m’envolar. La fotò es un raubadís sens dolor del bonaür partejat. Las de Jacme Saraben nos revèlan un òme atentiu, captiu de cada beluga.
Aquels darrièrs temps a mitralhat sus lo tèma de l’aiga. La Dordonha, la Vesera e los petits rius que davalan en tota sason al pè dels moflons. Òc, per çò que i a de moflons sus la Landa de Paunac ont a obèrt son talhièr d'artistas baptejat « La Sorga » coma se deu. Sos « instants de vision » coma los a nomats nos entraïnan al dedins d’el, indirèctament. « stás en el interior de los reflejos, estás en la casa de la mirada » (Ses en dedins dels rebats, ses dins la maison de l’agach)..
« La casa de la Mirada » aquò’s aquel luòc de la creacion revelat dins lo manifèste artistic d'Octavio Paz dedicat al pintre Roberto Matta. « El corazón es un ojo » (lo còr es un uèlh) çò-ditz, e tot çò que al fons de nosautres se reconeis dins çò que l'òm agacha nos balha la fòrça de demorar en vita.
Amb la complicitat d'Annie Delpérier, trobairitz, e Miquèl Testut, escrivan, Jacme Saraben presentarà sas fotòs sul tèma de l’aiga lòrs de la clausura del cicle dels cafés literaris de Mont Paun e Menestairòu lo 13 de junh que ven. Una ocasion de rencontrar l'artista, son afògament e sos silencis, e d'entendre dire de tèxtes causits, al fial de l'aiga.

Sofia Cattoire

informations pratiques :
« UN DIMENGE AL BÒRD DE L'AIGA »
Mont Paun e Menestairòu
Dimenge 13 de junh 2010 a tres oras mieja del vèspre sus la petita iscla de Menestairòu
Exposicion « Instants de vision », fotografias de Jacme Saraben
sul tèma de l'aiga. Lectura de tèxtes causits per Annie Delpérier e Miquèl Testut
Reservacion obligatòria per lo « tea-time » (10 €)
alprèp del Restaurant de l'Eclade : 05 53 80 28 64.
Copyright (c) Ferrassie-TV - Fotografias de Jacme Saraben Fotòs | Somari