Veire los reportatges videò Fotòs de l'article Estampar l'article Acuelh Barratz aquela fenèstra Veire los reportatges videò Estampar l'article Acuelh

LAS ALAS DEL DESIR CAREÇAN LO PERIGÒRD
en abrial sus FRANÇA 3 SUD OÈST

Es un ausèl, una camerà sul front, l'autra sus lo ventre. Per tèrra, un pilòte experimentat recep son imatge frontal e pòt ental entrar dins las plumas de l'ausèl e « téner lo mangle ». La segonda, orientabla, filma çò que lo cap operator causís de cadrar dempuèi aquel punt de vista mai encara qu'aerian, celeste, volatile, capable de s'envolar coma una fusada, vironar coma una busa o se lançar coma un falcon sus sa preda, en un mot, capable de volar baujament dins lo grand bal dels ausèls. Laidonc, lo regard de l'espectator s'envòla, vibra, barbela jusca a la virason, de còps que i a.

Aquel « drone » lonja de bas en naut la Ròca Sent Christòu, fortalesa trogloditica talhada d'aquel famós « baloard de l'umanitat » ont quela d'aquí se preissa efectivament dempuèi la nuèch dels temps, e l'òm retròba pincat sus la pus nauta terrassa, fòrt estrecha, lo valorós Joan-Max Touron, esquina al gorg, revendicant gloriosament son apartenéncia a aquel pòble dels bauçs que sos aujòls desclapèron aquel « Machu Picchu » perigordin.

Fàcia a el, apiejat al bauç, intrepide mas prudent, Eric Perrin l'escota e sabora lo moment. Car aquel ausèl, es ben autorn d’Eric que vira e viravòlta. Es lo passaire d'aquela subrebèla seria incarnada intitulada « Cap Sud Oèst » desvolopada per Clara Combes, que l'aviá iniciada a França 3 Lemosin, e que prenguèt en man las destinadas de França 3 Aquitània al printemps passat. Una seria innovanta dins sa fòrma, eleganta, enlevada, e prigonda dins son apròpcha. Dire l'essencial, anar drech al but, dins la fòrça, dins l'instinct, e bufar lo desir de venir e d'anar pus lonh. Un batament d'ala per un efièch parpahòl, balhar d'alas d'angels a nòstras imaginacions.

Lo mai pivelaire, es que tots aquels edificis, ciutat trogloditica, casals, castèls, fuguèron realizats per una perfeccion vista del cèl que an sonca pogut imaginar lors bastisseires. Gràcia siá renduda a aquel « drone » que revèla uèi, e a totas las nautors, lor visionària esplendor.



Aquel mes d'abrial, Cap Sud Oèst lança son « drone » au dessús de la Dordonha per dos numèros :

  • « La Dordonha, lo País de l'Òme »
  • « Perigòrd, los 1001 Castèls »

« La Dordonha, lo País de l'Òme » vos menarà dins la preciosa comba de Castèl Mèrle, clafida d'abrics sos ròca paleolitics, als costats de Sergi Maury, preïstorian e talhaire de frejal sens parier, e a la rencontra d'Isabèl e Renat Castanet, a qui aquel film es dedicat. Puèi, aprèp una visita estorbissenta e extraordinària de La Ròca Sent Cristòu acabada per un subrebèl plan final a la Sean Penn per « Into the Wild », Eric Perrin nos farà dintrar dins las resèrvas del musèu nacional de preïstòria drubèrt a titre tot a fet excepcional per lo mèstre dels luòcs, Joan-Jacme Cleyet Merle.

« Perigòrd, los 1001 Castèls » vos farà planar au dessús dels pics rocassós ont s'enauçan ufanós, los castèls de Bainac e de Castelnòu, dins la val de Dordonha. Prendretz, non sens estrementida, un monta-davala invisible lo long de las cròsas, dels abrics e dels domnons de la belòia de la val de las Beunes, lo castèl de Comarca, guidat per Ubèrt de Comarca, preclar descendent dels senhors bastisseires. Enfin, quitaretz coma a regret nòstre bèl Perigòrd en volar sus los castèls de las Mirandas, de Lòssa e d'Autafòrt, ont vos seràn contats sus la basa d' arquius estonants las esplendors e malurs d'aquels nauts luòcs d'Istòria.


Sofia Cattoire


Aquelas emissions seràn difusidas successivament dissabte 13 e 20 d'abrial a 4 oras 20 del vèspre sus França 3 Aquitània, Lengadòc-Rosselhon, Lemosin, Miègjorn-Pirenèus, Peitau Charentas e tornar difusir lo dimars seguent a 10 oras un quart.

 

Mercejam Emanuèla Hardy e Eric Perrin per las fotòs e las videòs que compausan aquela pagina.

Copyright © Ferrassie-TV lo 12 d'abrial de 2013 Videò | Fotòs | Somari