Fotòs de l'article Estampar l'article Somari Barratz aquela fenèstra Estampar l'article Somari

ESPECIALA DEDICAÇA ALS CHIVALIÈRS D’ALBUGA

Aquò’s vertadièrament plan bon aquel nom dels « Chivalièrs d’Albuga » représ per tots mos confrairs jornalistas, mos frairs, mos amics. Pòdi ben zo dire puèi qu’aquò’s ieu que l’ai inventat. Es sortit coma aquò, dins mon esperit, al moment convengut. Vòstre magazin d’informacion en francés / anglés / occitan www.albuga.info èra nascut amb l’estiu 2006, e nòstres campions en crampons èran desjà sul camin de la glòria. Aprèp los onors, anavan se far adobar en Federala 3 e òm credava desjà a l’esplech. Mas, aquò fasiá nonmàs començar. Remontats a fons, bravavan tots los « tornegs » de las fasas finalas e obtenián de mai lor accession a la Federala 2, lo titre de « Campions de França » sul prat de Marmanda aquel famós 10 de junh de 2007. Endonc, aprèp aver filmat l’esplech emb mai d’una cameràs, atacavem tota la pòst-produccion del grand film de la victòria : « Los Chivalièrs d’Albuga a la conquesta del Boclièr ». Risetz pas, o si, anatz-i francament se voletz, mas sapchatz qu’aquò’s atal que nàissan las legendas, amb de l’engenh, de coratge, de vam, un pecic d’autras facultats mens confessablas mas tant indispensablas, e puèi de mots, de las idèas tanben, que van plan amb l’euforia e l’èime del moment. Tot aquò per vos dire, cars chivalièrs, que quand, tots agremolits a la pausa, lançatz tots ensemble vòstre subrebèl crit de raliament « Albuga ! », aquò nos fai vertadièrament caud al còr, a nosautres, los modèstes reporters d’Albuga !


ALBUGA ! DOBRÍS-TE…

Endonc, aquesta sason enquera, faguèretz de las proësas e veiquí Albuga, vòli dire la genta vilòta d’Albuga, a las pòrtas de la Federala 1 amb de chivalièrs en cap de gropament d’equipas lebretant d’anar se fregar als Senhors d’aquela Terra en principi Incognita per de campanhards, quitament adobats ! Aquò vos prusís e coma aquò seriá pas lo cas, mas la montada a un pretz, elevat, e segon la formula consacrada, vos cal « reüssir a arremosar lo budgèt en concertacion amb tots los partenaris publics o privats ». D’aquí enlà las fasas finalas vos esperan e avem tots ben comprés qu’aniretz pas alai per ne’n préner…

Aprèp vòstras doas darrièras victòrias, importantas, a la maison contra Fumel 65 a 15 e mai radicala enquera contra Nerac 70 a 0, pus ren vos arrèsta e se passatz lo cap dels 16èma e dels 8èma, caldrà passar al grat superior : los Senhors d’Albuga !...

LOS DAMAISÈLS SUS LA TRAÇA DELS CHIVALIÈRS

Per demorar dins l’estile medieval e occitan que vai tant a l’èime valorós de nòstres pros jogaires e a la gràcia discrèta de lor vilatge onte Dama Asalais fondèt una abadiá als alentorns de l’an 1000, rapelam simplament qu’avant d’èsser adobat chivalièr un jòune gentilòme es sonat damaisèl.

Benastrugam endonc los damaisèls e las damaisèlas de l’escòla de Rugbí d’Albuga qu’an enquera balhat aquesta annada a l’escasença del Challenge Selves Côme la mesura de lor determinacion a préner lèu lèu la relèva. Aquel campionat del jòunes, floron del jòune rugbí aquitan s’es debanat amb una afluéncia recòrd e jos un solelh magnific lo 26 d’abril darnièr a l’estadi Renaud Cruveiller.

Gràcia al plan brave reportatge fotò assegurat a caud per Carlòta et Bertrand Picq, vos prepausam una seleccion de las mai bravas fotòs d’aquela ovalia clarament prometeira e desjà en plen bolh. Enfin, aquí-dejós nòstre egrègi comentator esportiu PLB fai lo bilanç inedit d’una sason rugbistica inoblidabla per Albuga. E coma se ditz en çò nòstre : Anatz le Bugue, Albuga !

Sofia Cattoire

  Una sason excepcionala aquela sason 2007/2008, podriam dire istorica, tant los resultats an despassat los espers los mai optimistes. Desjà qualifiats en Challenge de l'Essòr, los d’Albuga an embragat en Campionat amb una invincibilitat a la maison e de plan nombrós resultats positius a l'exterior. Fin finala, terminan primièrs amb tres punts d'avança sul segond, un gròs braç de Segonda division, Gordon! Demest las melhoras atacas de la Division al nombre d'ensags, se classaràn demest los tot primièrs al classament mesclat de totas las divisions federalas. Lo public creissent, a Albuga coma a l'exterior, s'es congostat tota la sason.

   Aquela primièra plaça al classament es sinonima d'accession dirècta en Primièra Division Federala! Aquò’s evidentament lo primièr còp qu’Albuga monta a un nivèl atal. E aquò’s segur lo primièr còp qu'una vila de 2 700 abitants costejarà los mai grands ! En mesma temps, l'Escòla de rugbí acumula los resultats. De notar las performanças dels Minimas que passan cada sason un nivèl suplementari. Los òmes del capitani Chalon e los co-presidents, sus una nivol, s'anoncian coma de redobtables competitors per las fasas finalas del Campionat de França.

PLB


Copyright (c) Ferrassie-TV 2008 - 11/05/2008 Photos | Challenge | Somari