LOS CHIVALIÈRS D’ALBUGA PROMOGUTS SENHORS DE L’ELÈIT AMATOR

Bon veiquí, òm pòt zo dire aurá : aquò’s segur Albuga vai anar se fretar a la Federala 1 a la dintrada … De jamai vist, de pas de creire e pasmens… Los jogaires se son batuts, an daverat aquel accessit e los partenaris publics e privats an acceptat de los acompanhar financièrament dins aquela aventura.
Los « campanhards » van donc tastar de la granda vila, los chivalièrs van dintrar dins los fièus dels senhors. Lor caldrà de mental, de topet e belcòp de finesa dins lo jòc manca de poder s’ofrir las pus bravas armuras e los pus afogats corsièrs, çò que dins lo fons a pas d’importància. L’esperit cavalieresc, nos l‘an mostrat dempuèi tres sasons dejà, aquò’s dins lo còr e aquò s’achapta pas laidonc anatz Albuga, Albuga !
Veiquí per acabar en beutat lo tot dernièr « bilan e perspèctivas » de nòstre egrègi confrair PLB, fidèl entre los fidèls dels chivalièrs d’Albuga. Vertadièrament, quò lor vai bien aquel nom... Que que ‘riebe d’ara enavant, l’auràn meritat plenament.

Sofia Cattoire

ALBUGA VAI DINTRAR DINS L’ISTÒRIA EN ACCEDISSENT A LA PRIMIÈRA DIVISON A LA DINTRADA

Pel primièr còp de l’istòria del club e queraque pel primièr còp dins los annals de la primièra division, un vilatge de 2800 estatjants, Albuga, va accedir a l’elèit amator. Los chivalièrs d’Albuga, aprèp aver conquistat aquela recompensa sul terren, venon de l’obténer dins los burèus de la federacion francesa de rugbí, lo dorsièr es estat acceptat a la mieg junh per las instanças federalas, tant financièras coma reglamentàrias.
Per çò qu’es dau campionat de França, aquí tanben una granda pagina de l’istòria del club fuguèt escrita puèi que los d’Albuga anèron jusca en 1/4 de finala del campionat de França de Federala 2, s’enclinant fàcia al gròs braç d’aquela division, Carcassona, fòrta d’ancians jogaires de Tolosa, de Narbona e d’endacòm mai. Los d’Albuga sòrton amb la tèsta nauta, aprèp una sason formidabla ont an acabats primièrs, destacats d’un subrebèl gropament d’equipas amb tres punts d’avança.
D’ara enavant lo recrutament bat son plen, l’adaptacion estructurala e economica es en plaça e los d’Albuga se preparan a viure la mai brava pagina de lor istòria, la mai audaciosa tanben. En principi, nonmàs las grandas vilas que pòdon balhar de gròssas subvencions pòdon accedir a ‘quel nivèl. Albuga podriá èsser l’exemple del vilatge que a lo coratge de batalhar a ‘quel nivèl amb un budgèt netament mendre.

PLB