Fotòs de l'article Estampar l'article Somari Barratz aquela fenèstra Estampar l'article Somari

LOS CHIVALIÈRS D'ALBUGA : LO RETORN

CHALLENGE ESSOR, lo 9 de setembre de 2007
Albuga / Saint-Médard-en-Jalles, marca : 31 a 6

Tòrnan e son plan contents, los campions de França, explosius, resistents, gormands quitament, amb de novèls visatges e dejà la meteissa solida complicitat que se legís dins los regards, sovent virat cap a Maxim Chalon, demieg de mesclada, terrible estratèg, que aquesta annada assumís en mai las fonccions de co-entraïnaire e de capitani. Tant val dire qu'es resolgut a fons, lo novèl capitani, e qu’aquò dèu pas flaquir darrièr…
Per sos primièrs pas en Federala 2, l'equipa d’Albuga a d'ara endavant botat lo turbò, en profitar precisament dels matchs de preparacion del Challenge Essor per iniciar las novèlas recrutas a totas las finesas del jòc d’Albuga e tornar formar un grop perfièchament sincròn. Aprèp la victòria contra Lormont dimenge passat, 29 a 14, Albuga afrontava l'equipa de Saint-Médard-en-Jalles que dins lo meteis temps aviá batut Sarlat, anciana equipa de Federala 1. Sens pagun complexe, los jogaires d’Albuga an menat lo jòc d'un cap a l'autre, marcant quatre ensags e acabant sus la marca sens apèl de 31 a 6 fàcia als Bordalès.

Albuga : 4 ensags. Antòni Vasquez (20'), Bernat Fakate (52'), Charlie Mesnard (64'), Damien Marty (68'). 4 transformacions e un còp de pè d'Antòni Vasquez. Saint-Médard-en-Jalles : 2 còps de pè de Cazelle. Cartons jaunes : Albuga, Cristòl Latapie (36'). Saint-Médard-en-Jalles : Bretos (36').

A la fin de la partida, Pèire-Lucian Bertrand, vice president del club, nos confiava lo plasèr que li aviá procurat quel rescontre sus lo prat :

« Çò mai surprenent, aquò’s lo nivèu actual d’Albuga, aprèp nonmàs dos matchs de preparacion, per çò qu’es de la condicion fisica e del nivèu tecnic. Beucòp de temps de jòc, bòtan de jòc en plaça davant e darrièr en demorant seriós e coerents. Pauc d'equipas son a quel punt operacionalas dins quela debuta de setembre. Albuga es larjament al nivèu de la Federala 2 e l'a demontrat uèi sens ambigüitat. Los jogaires an desrotlat de la primièra a la darrièra minuta un jòc mestrejat, fisèls al trabalh a l'entraïnament, e an concretisat logicament al fial de la partida lors esfòrç amb quatre ensags. »

Lo novèl entraïnaire, Frederic Chastaing, ancian jogaire e entraïnaire de Trelissac, ancian jogaire d’Albuga tanben, repren lo brandon de Gil Bouyssou e Tierrí Félix amb beucòp de passion e d'estrambòrd. Aquò’s qu'es ufanós de trabalhar amb los campions de França de Federala 3. Lo corrent passa, l'amistat tanben, çò que demòra l'un dels atots màgers del club d’Albuga.
Per aquela rentrada, avèm agut tanben lo bonür de tornar trobar sus lo terren Antòni Vasquez, 44 printemps, qu’aviá anonciat son intencion de penjar los crampons aprèp la victòria del club en finala del campionat de França, lo 10 de junh passat a Marmanda, e que fin finala a agut la bona idèa de renquilhar enquera una sason. Sens falhir, a aimablament botat un ensag, quatre transformacions e un còp de pè, amb totjorn la meteissa perfiècha concentracion.
Lo campionat començarà lo 15 d’octobre, amb las valors seguras del club en plena fòrma e a lors costats de novèlas recrudas plan motivadas per se botar al diapason, demest elas òm pòt d’ara endavant citar : Bernat Kafate, Cristòl Latapie, Florenç Castanetot, Pèire Blanc, Ludovic Croizet, Mikaël Barat, Jérémy Péloux e Charlie Mesnard. Sens oblidar los jogaires juniors que passan en seniors : Cedric Restout e Nicolau Royo.

A la fin de la partida e aprèp una darrièra reünion sarrada amb los novèls arribants, Maxim Chalon nos a revelat lo secret de la grand fòrma fisica dels jogaires d’Albuga per aquesta rentrada :
« Beneficiam lo dimars de ser de la preséncia de dos preparators fisics, de pròs que venen del rugbí a XIII. Òm sent qu'òn i ganha vertadièrament en explosivitat e en resistància. Òm rentra dins una autra dimension vertadièrament estimulanta. Aquelas doas victòrias en dos matchs son plan encoratjantas, mas cal contunhar de progressar. Perdem enquera tròp de balons sus la conquista e sus las mescladas espontanèas. Sèm pas enquera en plaça sus nòstres lançaments de jòc, tòcas e còps de pè de debuta. Lo sol remèdi aquò’s de trabalhar e trabalhar enquera, jorn aprèp jorn jusca a la represa del campionat. Lo gròs punt positiu, aquò’s qu’òm pren pas d'ensags. Los goiats an lo meteis còr que l'an passat. Et tusta fòrt. »

Propchan match a Floirac, dimenge 16 de setembre. Floirac que de son costat ven de batre Sarlat e Nontron. Una brava confrontacion en perspèctiva.

Sofia Cattoire

Copyright (c) Ferrassie-TV 2007 Fotòs | Somari