Veire los reportatges videò Fotòs de l'article Estampar l'article Acuelh Barratz aquela fenèstra Veire los reportatges videò Estampar l'article Acuelh

SE TE PLAI, PEDALA-ME UN LAMPION !

Innovacion tecnologica e ecologica al Gorg de Promeissac en Dordonha : lo mai grand cròs geologic de Perigòrd chafrat « la Catedrala de Cristal » prepausa a sos visitaires de pedalar sus de bicicletas generatritz d'electricitat batejadas Vel'Watt per fin de contribuir al còst energetic de lor visita. Un bel exemple de torisme durable desvolopat pel Gorg de Promeissac, l'Ofici de Torisme Lascaux Dordogne Vallée Vézère, l'ADEME, la Region Novèla Aquitània e certificat per l'AFNOR.
Lo Gorg de Promeissac es la primièra cròsa de França a aver l'apellacion « NF Environnement - Sites de Visite ».



Al Gorg de Promeissac, a Audrics en Perigòrd, òm aprend pas a far de fòc... mas de la lumièra ! Òm freta pas, òm pedala e jos tèrra, la Catedrala de Cristal fargada gota a gota dempuèi de milierats d'annadas s'esclaira. Basta, d'ara enavant cada visitaire d'aquel legendari "trauc del diable" vengut dieusenc cròs gràcia precisament a la resplendor de sos jòcs de lumièras, pòt contribuir a aquel brave esclairatge. La beluga gisclèt dins l'èime del mèstre dels lòcs, Alan Francès, de longa data investit dins la proteccion de l'environament. Desvolopa a aquel titre ‒ e lo sabèm pauc ‒ de teuladas solaras suls bastiments agricòles al dintre de l'entrepresa Voltadrix que creèt en 2011.

CAÇA ALS GASPÍS A TOTS LOS ESTATGES

De fach, Alan Francès a engatjat dempuèi mai d'una annada una soscadissa globala per limitar las despensas en matièra d'aiga, d'esclairatge e de calfatge. Es atal qu'un circuit d'aiga de pluèja alimenta los sanitaris, l'asagatge e los rius artificials del Gorg de Promeissac. Dins lo hall d'acuèlh, un calfatge al sòl a remplaçat la bufada dels ventilò-convectors, belcòp tròp gormands en electricitat. Per çò qu'es de l'esclairatge del Gorg el meteis, de gradators son estats installats per sollicitar just la poténcia necessària a cada moment e de mai, los projectors los mai energivòrs son estats abandonats al profièch de sistèmas amb diòdes electroluminescentas. Gràcia a aquela eficaça « caça als gaspís », en novembre 2016 lo Gorg de Promeissac fuguèt la primièra cròsa de França que obtenguèt l'apellacion « NF Environnement - Sites de Visite ».

LA TESTA E LAS CAMBAS

Alan Francès voliá anar enquera mai lonh. Aquò's alara que faguèt aquel interessant apròchament :

« consomam 130 000 qWo per 140 000 visitors cada annada, siá un pauc mens d'un quilowattora per visitor. I a aquí coma una correspondéncia, un potencial d'energia a considerar coma tal. Bastariá de reinjectar un pauc d'energia de cada visitor dins lo site per ne'n limitar enquera l'impacte environamental. »

A aquel estadi, l'idèa de la bicicleta generatritz d'electricitat èra pus plan lonh. Alan Francès ne'n descobriguèt l'utilisacion aicí e alai, mai que mai per tornar cargar los telefòns portables dins qualquas garas.

Demorava d'optimizar lo potencial d'aquela mena d'aparelh per que son apòrt fuguèsse significatiu. Confièt aquela mission als profesionals del Talhièr del son e de l'image, societat del Chasteu amb qui trabalha dins aquel metòde ecologic global dempuèi 25 ans. Son Bertrand Gazi, tecnician audiovisual, e David Martinet, cargat de projècte, que realizèron la recèrca e lo desvolopament del prototipe. Velocidad, demultiplicacion, ergonomia, estetica, tot fuguèt concebut per que lo visitor se sentiguèsse recompensat de sos esfòrces. Pòt sus un tablèu luminós visualizar la portada de son gèste ecociutadan. Quand lo bacin es plen, ven ecovisitor diplomat, en condicion de telecargar aquel titre onorific sus Internet.

PROBLÈMA GLOBAL, SOLUCION LOCALA

Se los sièis Vel'Watt disponibles pòdon permetre als visitors los mai coratjós de produire 20 % de çò que lor visite consoma en electricitat, a tèrme, en contunhant de redusir las velas en tèrme de consomacion energetica del site toristic e en ameliorant aquels velò-generators experimentals, la contribucion dels visitors podriá capitar al percentatge non negligible de 35 %.

Longa vita als circuits corts. Cada iniciativa per produire sus plaça, gràcia al vent, al solelh e a nòstra energia vitala de que far virar nòstras lampas e aparelhs baissarà d'autant las riscas de destruire nòstre ecosistèma, la Tèrra. Rapelam que virar de milierats d'ectaras per traire de l'uranium ‒ qu'es pas renovelable ‒ per far virar de reactors qu'òm mestreja totjorn pas, pòt menar a embarrar en Ucraïna o al Japan l'Apocalipsa jos de sarcofages de beton, a pus prèp tant eficaces sul long tèrme coma una fuèlha de papièr a rotlar sus un volcan.


Sofia Cattoire
Jornalista grand reporter

 

La mesa en plaça dels sièis Vel'Watt al Gorg de Promeissac representa un investiment de 100 000 €. L'ADEME (Agéncia de l'environament e de la mestresa de l'energia) participa a nautor de 16 000 €, la Region Novèla Aquitània, a nautor de 25 000 €. L'operacion es estada certificada per l'AFNOR (Associacion francesa de Normalizacion).

 

Revirada en occitan : Joan-Claudi Dugros

Copyright © Ferrassie-TV 13 avril 2017 Videò | Fotòs | Somari